«Detrás das grandes revolucións dixitais de hoxe en día, que evolucionan a unha velocidade vertixinosa, hai profesionais das telecomunicacións que souberon anticiparse aos retos que a sociedade vai marcando» – Martínez Pérez, decano do COETTGA
A terceira edición dos Premios Enxeño reúne en Santiago de Compostela máis de medio cento de enxeñeiros técnicos de telecomunicacións no ForoTelecos Galicia 2023.
«Os enxeñeiros técnicos de telecomunicación xogamos un papel imprescindible nesta época e nunha sociedade de absoluto dominio tecnolóxico» – José Manuel Martínez, decano do COETTGA.
A colexiada Emilia Seoane, recoñecida co premio Enxeñeira do Ano.
Santiago de Compostela, venres 13 de xaneiro
Xornadas de encontro, networking, premios de recoñecemento, presentacións e reivindicacións: todo isto tivo lugar no III ForoTelecos Galicia. Un evento ambicioso para visibilizar e poñer en valor o traballo diario dos «telecos galegos» e potenciar a imaxe do Colexio de Enxeñeiros Técnicos de Telecomunicacións de Galicia (COETTGA).
O Hotel Oca Puerta del Camino foi o escenario elixido, ao que acudiron máis de medio cento de enxeñeiros técnicos de toda Galicia, representantes doutros colexios homónimos e autoridades para apoiar esta terceira edición do ForoTelecos organizada polo COETTGA.
O evento comezaba a última hora da tarde coa recepción de convidados e autoridades. Deu paso a un cóctel co respaldo dos produtos que ampara a marca Galicia Calidade e, acto seguido, á entrega dos Premios Enxeño 2023, para rematar cunha cea de confraternización que contou coa presenza do director da Axencia para a Modernización Tecnolóxica de Galicia (AMTEGA), D. Julio Cerviño, encargado de clausurar o acto.
Antes da entrega dos recoñecementos a entidades e profesionais, José Manuel Martínez, decano do COETTGA, dirixiu unhas palabras para reivindicar «a presenza e a capacidade de adaptación e desenvolvemento dos enxeñeiros técnicos en telecomunicacións naquelas esferas públicas que teñen que potenciar a dixitalización e a implantación das novas tecnoloxías», co fin de reforzar e impulsar o valor dos proxectos de enxeñaría técnica de telecomunicacións, fundamentais no crecemento e no correcto funcionamento de toda a sociedade. De feito, Martínez lembrou que «o traballo do COETTGA é representar este colectivo e darlle visibilidade, así como respaldar iniciativas e proxectos relacionados coas TIC e cos retos dos seus profesionais». O decano do COETTGA afirmou que «detrás das grandes revolucións dixitais de hoxe en día, que evolucionan a unha velocidade vertixinosa, como o blockchain, o metaverso, o big data, a ciberseguridade, a IoT ou a popularización das criptomoedas, hai profesionais das telecomunicacións que souberon adaptarse aos cambios e anticiparse aos retos que a sociedade vai marcando»; por iso, ademais de ser unha profesión con alta inserción laboral, é tamén eixe central da maioría das transformacións que está a vivir o mundo.
Premios Enxeño 2023
A seguir, os representantes do COETTGA fixeron entrega dos Premios Enxeño 2023, unha terceira edición de galardóns que recoñecen a traxectoria de profesionais e entidades no mundo das telecomunicacións.
Premio Enxeño 2023 á Delegación de Alumnos de Telecomunicacións, polo seu labor de representación das novas xeracións dentro da profesión.
Premio Enxeño 2023 á Asociación Galega de Blockchain e IoT (AGALBIT), por tratarse dunha iniciativa innovadora que proxecta as telecomunicacións na sociedade actual.
Premio Enxeño 2023 á Rede de Robótica Educativa, por levar as telecomunicacións e as novas tecnoloxías ás aulas desde idades moi temperás, onde se forxarán os futuros profesionais do noso sector.
Premio Enxeño 2023 á «Enxeñeira do Ano», á traxectoria da colexiada Emilia Seoane, adxunta á dirección técnica de RETEGAL, recentemente xubilada. Sempre visibilizou e defendeu o papel da muller nun sector eminentemente masculino.
